你有羊腩煲，但我只得番幾盤花及草

今日竟然俾我見到呢一篇講有關大埔羊腩煲事件。

大埔o既大排檔，我咁大個仔只係去過一次，睇到佢俾人趕上樓，無哂特色，真係有d 失落。o個棟咁o既街市大廈真係同大埔墟附近o既環境格格不入，仲衰過朗豪坊。

其實有羊腩煲食都算係咁喇...只少有個聚腳點。

話說我有細到大o係大興村長大(真係由出世o個一刻，直到19歲先搬去天水圍)，識性以來每星期總有一晚會落留下宵夜檔逛下、買下野食。 我相信大興o既宵夜可以話當時公共屋村數一數二大型o既場所，o個度起碼有幾十檔，沿住街市外圍的街道，一檔一檔咁賣唔同o既食物如魚肉翅、炒蜆、煎蠔餅、生滾粥、上海粗炒、煎鍋貼、串燒、糖水；仲有唔同o既雜架攤般，有舊雜誌、舊漫畫、玩具等。

真係相當旺，起碼會開到零晨兩三點，過年過節仲會開通頂，做埋早餐先肯收工。
就係因為咁大規模，有d 人仲會慕名特登渣車入o黎一品風味。

我覺得宵夜最大o既特色就係乜都係供開，一眼睇哂，無遮無掩，唔似得普通食肆咁，廚房係收埋o既，個大廚有幾勁都無人知啦。小小o既地方就成為各大高手表演o既舞台咁，就好似炒蜆咁，即叫即起鑊，d 火 "紅紅聲"咁，個大廚青根都露埋出o黎幾過引呀。
又好似賣生滾粥咁，一次整4, 5煲，o個度執d , 呢度執d , 手勢非常熟練，有時仲要幫手整腸粉...簡直能人所不能。人地話有管理o既商場點都乾淨d，但係露天o既食檔乜都俾你睇哂，佢有幾污糟你都可以知道la，但係商場就....其實佢做得街坊生意，要o係o個立足，又點可以太過污糟呢？只少唔會食到你肚痛，食物中毒，好似朗豪坊咁。

賣舊書o既地方都得意呀，d 人踎o係度睇，一路睇, 一路講，我o係遠處睇佢睇緊咸書個樣都幾特別(不過可能只係我o既想象)。

好可惜，此情此境不再，聽講好似話d 黑社會收陀地收到連差人唔面，於是政府一怒之下，o係o個度一口氣種左十幾棵植物(以石屎盤載住o個種)，仲晚晚搵4,5個食招守住...實行趕絕宵夜檔。

唉....o個度o既檔口可以話養大好多家，亦係大興村或者附近o既居民聚腳o既地方，而家吹水，最多只可以o係ok 賣幾枝野飲，買d 零食，上天台吹水，但亦有機會會有差人來查身份證...點同以前邊食邊傾咁正。